నింగి – నేల

రచన: కాలనాధభట్ట వీరభద్ర శాస్త్రి

అది డిపార్చర్ లాంజ్
అందరి మొహాల్లోనూ విషాధ ఛాయలు
ఫైనల్ కాల్ టు ప్యాసింజర్స్ ఆఫ్
ఫ్లైట్ నెంబరు సో అండ్ సో
ఫర్ సెక్యూరిటీ చెక్
విమానం నింగికి ఎగిరాక
చిన్న చుక్కై ఆనక అదౄశ్యమయ్యాక
ముక్కు చీదుకుంటూ
కళ్ళు తుడుచుకుంటూ
భారమైన హౄదయాలతో
తిరోగమనం

అది అరైవల్ లాంజ్
విప్పారిన మొహాలతో
కళ్ళల్లో ఉత్సాహం పొంగుతూవుంటే
ఫ్లైట్ దిగిన ఒక్కొక్కరే వస్తూవుంటే
ఆతౄతగా తమవారికోసం
తలల వెనక
మునిగాళ్ళపై నిల్చుని చూస్తూవుంటే
అదిగో తళుక్కుమంది తార
హాయ్ హాయ్ పలకరింపులు
ఆప్యాయతతో కౌగలింతలు
ఆనందాశ్రువుల ధారలు
ఉత్సాహంతో ఇంటికి
నింగి విషయం మర్చిపోయి 

నాదొక కోరిక ( స్కెచ్ )
రచన:
కాలనాధభట్ట
వీరభద్రశాస్త్రి
 
చెట్ల చిఠారుకొమ్మన
లేచిగుళ్ళను తాకి ప్రసరించే
కమ్మ తెమ్మెర
ఎగిసిపడే సముద్రపు అలల తుంపర్ల స్పర్శ
నీలిఆకాశంలో దూదిబంతుల్లా తేలిపోయే
మబ్బుల గుంపులు
ఆ మబ్బులచాటున దోబూచులాడుతూ
తన కిరణాలతో
భూమాతను పులకిరింపచేసే భానుడు
రణగొణధ్వనిచేసే టెలెఫోన్ మోతవినబడని రోజు
ఒకచేతిలో చిక్కటి వెచ్చటి కాఫీ కప్పు
పక్కజేబులో వేయించిన పల్లీలు
వంటరిగా వూరిచివర నిలబడి
ప్రకౄతిలోని అందాన్ని తిలకించేందుకు
కాలవమీద ఒక సన్నని కాలిబాట వంతెన
ఇవన్నీ కుదిరినవేళ బహుశా
సంతోషంతో వూగిపోయే నా మనస్సులో
అద్భుతమైన  కవిత్వ భావ స్పందన
కలగవచ్చునేమో

అల్లసాని పెద్దనార్యా
నువ్వు అదౄష్టవంతుడవయ్యా!!

సూక్తి ముక్తావళి (పద్య కవిత)
రచన: కాలనాధభట్ట వీరభద్రశాస్త్రి

1. శ్రీ యటంచు మొదట వ్రాయుదురెందరో
గద్యరచనయందు పద్యమందు
కాని కవికి సిరులు కలుగుటే అరుదురా
శాస్త్రిమాట నేటి జగతిబాట

2. కవితవ్రాయువారు భువిని కోకొల్లలు
వ్రాయుచుందురెపుడు రాశి కొలది
రమ్యమైన కవిత రాశికన్నను మిన్న
శాస్త్రిమాట నేటి జగతిబాట

3. భాషవచ్చినంత పండితుడేగాడు
మాట ఇచ్చినంత మంత్రి గాదు 
ముష్టిఎత్తువాడు ముక్కంటిగాడురా
శాస్త్రిమాట నేటి జగతిబాట

4. అప్పు అడుగువేళ గొప్పగా పొగడును
అప్పు పుచ్చుకొనగ అతని మరచు
అప్పుతీర్చమన్న అధముడేయగునురా
శాస్త్రిమాట నేటి జగతిబాట

5. కట్నమీయమన్న కర్కశుడందురు
కట్నము వలదన్న కల్మషుండు
కష్టపడుచునైన కట్నమే యిచ్చురా
శాస్త్రిమాట నేటి జగతిబాట

6. ఉవిదమగనితోడ వుద్యోగమునుచేయు
యింటిపనులుచేయు వంట చేయు
నాడునేడుకూడ ఆడబ్రతుకిదియేర
శాస్త్రిమాట నేటి జగతిబాట

7. అన్నదానమీయ అట్టెకరిగిపోవు
ధనముదానమీయ తరగిపోవు
విద్యదానమొకటె వికసించు నెప్పుడు
శాస్త్రిమాట నేటి జగతిబాట

8. కాలు బయట పెట్ట కావలె నెప్పుడు
రాజకీయమందు రక్షణంబు
నిత్యశంకితంబు నేతల బ్రతుకురా
శాస్త్రిమాట నేటి జగతిబాట

9. కులము మతములనెడి కుత్సిత భావాలు
ఐకమత్యమునకు అడ్డుకావె?
మమతలేని మతము మనుజులకేలరా
శాస్త్రిమాట నేటి జగతిబాట

10. చవటవాని తెచ్చి సన్మాన మొనరింప
బుద్ధిశాలి యగునె మొద్దుగాక?
కాకి హంస యగునె కలరుకోటింగీయ
శాస్త్రిమాట నేటి జగతి బాట

11. ముసలివారలంచు విసవిస పడనేల
వృద్ధ వసతులందు వేయునేల?
ఆదరణకొరకు అర్రులుజాచరె?
శాస్త్రిమాట నేటి జగతిబాట

12. సెక్సు విద్యకూడ చెప్పవలయునంచు
వుబుసుపోక లేచె వుద్యమంబు
పాఠశాల అపుడు వ్యభిచారశాలరా
శాస్త్రిమాట నేటి జగతిబాట

13. ఓటుకొరకు వచ్చు ఒకసారి పదవిలో
ఓటువేయ ముఖము చాటుచేయు
ఓట్లు తనకు, మనకు పాట్లే మిగుల్చురా
శాస్త్రిమాట నేటి జగతిబాట
 
14. సిల్కులాల్చి, పంచె, సేవకు శిష్యులు
ఫష్టు ఏసి మరియు బెష్టు వసతి
సౌఖ్యమొందువారు స్వాములీనాడురా
శాస్త్రిమాట నేటి జగతిబాట

15. మూగజీవి యంచు ముంగిట కట్టిన
పశువు గడ్డిమేసి పాలనిచ్చు
పాలుత్రాగి మనిషి పశువునే చంపురా
శాస్త్రిమాట నేటి జగతిబాట

18. తేటనెనుగు నుడికి సాటిలేదిలలోన
ఎట్టిభాషలందు యెంచిచూడ
తెనుగు పదమునందు తేనెయే చిందురా
శాస్త్రిమాట నేటి జగతి బాట

19. సీసపద్యమందు సింగారమొలికించు
తేటగీతియందు తేనెలొలులు
ఆటవెలది రాజహంసలానడుచురా
శాస్త్రిమాట నేటి జగతి బాట

20. అంద మొప్పుచుండు కంద పద్యంబున
జాతివృత్తమటుల చాలగలవు
ఛందొబద్ధ కవిత సాహిత్య సామ్రాట్టు
శాస్త్రిమాట నేటి జగతి బాట

21. ఆంగ్లనవలనేడు ఆరాధ్యమయ్యెను
తెలుగునవల వ్రాయు తెరవునందు
సరస గ్రంధ చోర సాహిత్యమహిమరా
శాస్త్రిమాట నేటి జగతి బాట

22. దూరదేసమేగి దొరలాగ బ్రతికినా
వేషభాషలందు బేధమున్న
మాతృభాషనెపుడు మరచిఫోరాదురా
శాస్త్రిమాట నేటి జగతి బాట

23. తెలుగుభాషలోన కలవు ప్రక్రియలెన్నొ
ఎవరికిష్టమేదొ ఎంచుకొంద్రు
దానిపైన ఏల తగవు విమర్శనల్
శాస్త్రిమాట నేటి జగతి బాట

24.మీడియాలొ మహిళ యాడులో కనుపించు
అర్ధనగ్నదేహ హాసలీల
వనిత బ్రతుకు తుదకు వ్యాపార మాయెరా
శాస్త్రిమాట నేటి జగతి బాట

25. మొదటిచూపులోన మోహమేజనియించు
ప్రేమ యంచు పెద్ద పేరుపెట్టు
పెళ్ళియాడి పిదప విడిపోవజూచురా
శాస్త్రిమాట నేటి జగతి బాట

26. పెళ్ళిగాకముందు పెరవారిరువురూను
తాళికట్టగానె దగ్గరైరి
మమత పెంచుకొంచు మసలగా వలయురా
శాస్త్రిమాట నేటి జగతి బాట

27. పూలు కుంకుమయు పొలతికి సహజంబు
పెళ్ళిగాకముందె పెట్టుకొనదె?
పతిగతించ వాటి వర్జింపనేలరా
శాస్త్రిమాట నేటి జగతి బాట

28. నూరబద్ధములతొ నొక జంటకలుపగా
సాయపడుట యెంతొ న్యాయమగును
కాపురములుగూల్చు కల్లలాడ తగునె
శాస్త్రిమాట నేటి జగతి బాట

29. ఆలితోడ సినిమహాలుకు వెళ్ళును
పక్కనున్న పడతివంకజూచు
భార్యనటుల జూచువారిపై అరచురా
శాస్త్రిమాట నేటి జగతి బాట

31. శ్రీగణేశుపూజ చేతురు ముందుగా
విఘ్నమేమిలేక విజయమొంద
మంచిపనులనెపుడు మన్నించు గణపతి
శాస్త్రిమాట నేటిజగతి బాట

32. నెలకు జీతమెపుడు నిశ్చయముగ వచ్చు
శ్రధ్ధపట్టి పనులు చేయనేల
అనుచు బద్ధకించ అది ద్రోహమేకద
శాస్త్రిమాట నేటిజగతి బాట
 
33. రైలుకన్న మరియు రాకెట్టుకన్నను
గాలికన్న పోవు నీలివార్త
దానివేగ మెంచ తరముకాదెవరికి
శాస్త్రిమాట నేటిజగతి బాట

34. కుంటివారుగాని గుడ్డివారుగాని
అంగలోపమంచు బెంగ ఏల?
అభ్యసించ పనులు అలవాటె యగునురా
శాస్త్రిమాట నేటిజగతి బాట

35. చిమ్మచీకటొక్క చిరుదీపకాంతిలో
మాయమగును అట్లె మంచిసూక్తి
మాపుమనసులోని మాలిన్య భావాలు
శాస్త్రిమాట నేటిజగతి బాట

36. చదువుకున్నవాడు సర్వఙ్ఞుడేయగు
చదువు కొనిన గాని చదువురాద?
విద్యనమ్ముకొన్న విలువేమి యుండురా
శాస్త్రిమాట నేటిజగతి బాట

37. గద్దెకొరకు యెట్టిఘాతుకమైనను
సలుపటదియె నెపుడు సహజమయ్యె
రాజకీయమందు రౌడిజం హెచ్చురా
శాస్త్రిమాట నేటిజగతి బాట

38. సభలలోన మంత్రి సర్వదా ప్రజలకు
సేవకుడనటంచు చెప్పుచుండు
తనను కలవబోవ దర్శనమీయడు
శాస్త్రిమాట నేటిజగతి బాట

39. పిసినిగొట్టువాడు పేరాశగలవాడు
అనుభవించకుండ ఆస్థిదాచ
తనయనంతరమది దాయాదిపాల్గాదె
శాస్త్రిమాట నేటిజగతి బాట

40. రాజసింహమౌర రాచరికమునందు
వీరసింహమౌర పోరునందు
గ్రామసింహ మింట గళమెత్తలేడురా
శాస్త్రిమాట నేటిజగతి బాట
 
41. నిత్యజీవితమున నెలకొనె భీతియు
ఇల్లు వదలి బయటకేగువాడు
తిరిగి ఇల్లు చేరు తెరవె సంశయమురా
శాస్త్రిమాట నేటిజగతి బాట

42. పాదచారి కాలిబాటపై నడవడు
వాహనములు పోవు బాటవెంట
పరగ రోడ్డురూల్సు పాటించు వారేరి
శాస్త్రిమాట నేటిజగతి బాట

43. మావటీడు చెంత మత్తగజంబైన
అణగి మణగియుండు అంకుశముకు
తెలివిముందు కండబలమెట్లు నిల్చురా
శాస్త్రిమాట నేటిజగతి బాట

44. బిచ్చగానివోలె వేషంబు వేయును
నటనలోనకీర్తి నందుకొనును
ముష్టివాని జూచి ముఖము చిట్లించురా
శాస్త్రిమాట నేటిజగతి బాట

45. మనిషి జన్మ ఎంతొ మహనీయమైనది
మంచి గుణముతోడ మసలవలెను
దైవదత్త మిదియె ధన్యతనొందరా
శాస్త్రిమాట నేటి జగతి బాట
(సశేషం)

********************************************************

నవ వసంతం

రచన: సతీష్ కుమార్ TVS

నవ వసంతపు ఉదయ వేళలొ
చిన్నారి గాలుల విందులే
కవికి కవితావేశం కలిగే
చిలిపి సవ్వడి చిందులే

మధురమే మధురమే మధు వసంత రాగమే
మధురమే మధురమే ఈ క్షణాల చలనమే

ఉదయ కాంతులు
నవ కళల కాంతులు     ||నవ||

***

కనులలొ కలలలొ
కీరవాణి రాగాలే

తనువులొ తపనలొ
అమౄతవర్షిణి రాగాలే

వినిన నా మనసులొ కనని ఏదో భావమే

మధురమే మధురమే మన విహంగ మార్గమే
మధురమే మధురమే ఈ క్షణాల చలనమే

ఉదయ కాంతులు
నవ కళల కాంతులు        ||నవ||

************************************

మరి వరుణదేముడు కరుణించాడో
సాగరజలం వేడెక్కి ఆవిరయిందో
గుంపులుగుంపులుగా కదలివస్తున్న
మొయిలుభామల్ని అలవోకగా
మలయమారుతం స్ఫౄజించిందో
శివతాండవానికి గంగ వలికిందో

జల జల చినుకులు రాలాయి
కుండపోతగా వానలు కురిసాయి
బీడువారిన నేలను తడిపాయి
ప్రాణికోటికి తాపం తగ్గించాయి

పుడమి తల్లి వడిలో
ఇంకిన జలరాశికి
ఒక్కసారి నిద్రలేచి ఆవులించి
గ్రీష్మం వికసించిందా అన్నట్టు
భూసుందరి జంటగ వెలికొచ్చింది
అహా! ఏమా వయ్యారం? ఏమా పుష్పవిలాసం!!

**********************************

అహం భవాస్మి

రచన: కాలనాధభట్ట వీరభద్ర శాస్త్రి

క్షీరసాగర మధనం జరిగేటప్పుడు

ముందుగా హాలాహలం వుద్భవించింది

రాక్షసులతోసహా అందరూ హాహాకారాలు చేసారు

బోళాశంకరుణ్ణి ప్రార్దించారు

సారీ! స్తుతించారు

ఉబ్బులింగడు పొంగిపోయి నేనున్నానంటూ వచ్చి

హాలాహలాన్ని గుటుక్కున త్రాగాడు

అప్పుడు తెలిసింది కాబోలు రుచి

మింగలేక కక్కలేక

గొంతుదగ్గర నొక్కిపెట్టాడు

దాంతో గరళకంఠుడయ్యాడు

భావితరాలకు మార్గదర్శకుడయ్యాడు

ఈనాడు ప్రతివాడు పరమశివుడే

సాంబశివుడు ఆ నాడు ఒక్కసారి మాత్రమే విషం మింగాడు

నేడు మానవుడు

అనునిత్యం జరిగే దురంతాల పరిణామాల

హాలాహలాన్ని నిరంతరం గ్రోలుతూ

మింగలేక కక్కలేక

నిస్సహాయంగా చూస్తూ అనుభవిస్తూ

అపర గరళ కంఠుడవుతున్నాడు

అందుకనే కాబోలు అనుకొంటున్నాడు

అహం భవాస్మి

******************************

నేను తెలుగు వాడను

కాలనాధభట్ట వీరభద్ర శాస్త్రి

********************************************

కుసుమాభ్యర్ధన

రచన: కాలనాధభట్ట వీరభద్ర శాస్త్రి

నేనొక పూలమొక్కకడ నిల్చితి పూలనుకోయునంతలో
మానసమందు తోచెగద మమ్ముల నివ్విధి బాధపెట్టగా
మానుమటంచు పూలు బ్రతిమాలుచు చూచువిధంబుగా
ఏనిక మిమ్ములకోయనని యింటికి బోవగనెంచునంతలో

నన్ను ఎవరొ పట్టినట్టవ ఒకపరి  
తిరిగి చూచినాను తెల్లబోయి
వక గులాబి కొమ్మ వంగి తగిలి తాను 
పలికె నన్నుజూచి బాధతోడ

చూడుమీ వనమంత సోయగమొలికించు
ప్రకృతిసౌందర్యమింపార నెరపె
మల్లెలు జాజులు మందార చామంతి
విరివిగా వికసించి పరిమళించె
పూవులన్నియు నొక్క పూసలదండగా
పరికింప కన్నుల పండుగయ్యె
ఇది మధుమాసమా ఏమని భ్రమకల్గ
చేసెడి రీతిగా సీమ వెలసె

కాని నేల రాలుకద మరుదినమందు
జన్మ వృధ మరియు విషాధభరిత
మగును కాద! అట్టి మమ్ముల వీడుట
న్యాయమగున మాకు సాయపడక?

పుట్టిన ప్రాణి గిట్టుటయు పుట్టుటయున్ సహజంబు, పుట్టినన్
వట్టినె రాలిపోవుటది పాడియ? ఏమిఫలంబది? తోచెనొక్కటిన్
గుట్టుగ తాప్రమోదమొనగూర్చిన, మెచ్చిన చాలు తృప్తియౌ
పుట్టుక సార్ధకం బగును పుష్పమలంకృతమంచెరుంగవే? 

మాగతికానకుండ అటు మళ్ళెదవేల దయానిధీ? త్వదీ
యాగమనంబుచూచితిమి హర్షిత భావ పులంకితంబుగన్   
స్వాగతమయ్యనీకు! మనసారగ తోచిన పూవులన్నియున్
వేగమె సజ్జనిండుగను పేర్మిని నింపుము వెంటగైకొనన్
త్యాగముకాదు నిక్కువము దైవ పదంబుల చేరుభాగ్యమున్
యీగతి దక్కనిమ్ము తడవెందుకు? సందియమేల రమ్మికన్

పొలతుల సిగలోన పూలచెండ్లుగ మమ్ము
ముడిచిన మాకదిమోదమవదె?
గొబ్బెమ్మపై మము కూర్చగ కన్నియల్
పాడుచు తిరిగిన భాగ్యమదియె
పెండ్లిలో దంపతుల్ పేర్మి తలంబ్రాల్గ
పోసుకొనుట మాకు పుణ్యమవదె
పూలమాలగకట్టి పురుషోత్తముని మెడ
చేరగా మాకింక చింతగలదె?

ఇట్టివిధముగా సేవల నింపుమీర
సల్పు భాగ్యము దక్కదె సన్నుతింప
మమ్ము గొనిపొమ్ము దయచూపుమయ్య నీవు
ఇటనెవున్న ప్రయోజనమేమి మాకు?

(పూవులను కోయకుండా చెట్టునేవుంచేస్తే అవి రాలిపోతాయి కనుక,  కోయండి, వుపయోగించండి అని పూవులు అభ్యర్ధిస్తున్న భావం)
 

ఏమిటి వెతుకుతున్నారు?
ముత్యాలకోసం
పాప నవ్వింది

సమాజమా? అదెక్కడవుంది?
రచన: కాలనాధభట్ట వీరభద్ర శాస్త్రి

అది ఒక సంధ్యా సమయం
జంటలుగా విహారానికి వచ్చే పార్కులో
ఒక చోట పచ్చగడ్డిపైన
నిమీళితనేత్రాలతో వెల్లకితలా పడుకున్న కవి

స్వామీ ఏమిటి దీర్ఘంగా ఆలోచిస్తున్నారు?
కళ్ళుతెరిచిన కవి చిరునవ్వు నవ్వాడు

కమ్మ తెమ్మర స్పర్సతో కల్గుచుండె
మధురభావాలు హేలగా మనసునందు
వచన కవితలో జొప్పించి  వ్రాయ నెంచి
వూహలందును విహరించ బోయినాను

ఆహా ప్రకృతి ఎంత సుందరంగా వుంది
గ్రీష్మ భాను తాపనివారణకా అన్నట్టు
నీలి గగనాన గుంపులు కూడిన మేఘాలు
ఆ మేఘాల చాటున భువిని
ముద్దాడబోతున్న తుషార బిందువులు
వాటికాహ్వానం పలికే నెమళ్ళ నర్తనలు
మలయమారుత స్పర్సతో పులకించి
టప టప రాలే వానచినుకులలో
తపతపమని  గంతులువేసే పిల్లలు
పచ్చని చెట్ల ఆకులచివర్లనుంచి
జాలువారుతున్న వాన చినుకులను
గవాక్ష వీక్షణలతో మురిసే ముగ్ధ కన్నియలు
ఆ చల్లని వాతావరణంలో
నాప్రియురాలి పరిష్వంగసుఖానుభూతిని వర్ణిస్తా
నేను భావుకుణ్ణి. సొందర్యోపాసకుణ్ణి
ఈ ప్రకృతిలోని అణువణువూ పులకింతలిచ్చే
మనోహర దృశ్యాలని నా కవితలొ జొప్పిస్తా!!

అయితే స్వామీ! సమాజం గురించి ఏమీ వ్రాయారా?

సమాజామా? అదెక్కడ వుంది ??

**********************************